Godd jedz isch ledz. Dein Sommer kaasch eipagga.
Schdand zu deine Schadda
on bloos dia Äcker anandernoch sauber
daß a Ruah geid

Laß vo mir aus nooh en Boom voll Äpfel rod werda
oder a baar Tomada
gib an nooh zwoe Däg - koen godzicha meeh!
Mach de Drauba Fiaß
on hau en nooh zemlich Öchsle nei

Wer jedz koen Bauschbarverdrag hod
kaas vergessa
Wer jedz alloe isch isch selber schuld
Noo soll der hald em naachds romgoischdera
romgruuschdla on ema Buach lesa
(wenn er ois hod)
on riesiche Briaf schreiba
(woner noo doch wieder wegschmeißd)
on em Wald romschdriala
on em Laub omanandersirmla.