Von und zu mir selbs.
Wan man hie keinen fort will führen /
Dann nur wer schmaichlen kann und schmieren;
Und wann du anderswo in Gunst /
Was bleibest du dan hie umbsunst /
Mit Herren groß ohn lehr und kunst?

Von und zu mir selbs. (2)
Zu rück / fort mit dir hinweg Herrlin /
Dan wan der fuhrman selbs unnd satler den raht geb /
Wird er sein / daß nicht lang der Weckherlin hie leb;
   So zeuch nu wider hin weg kherlin.

Von dem Schwaben Hanß Latzen.
Hanß laufft dear Graita noh ell tritt /
Vnd wills haun: Ischt er nit gscheid gnuog.
Grait will da Hanßa kurtz umb nitt /
Ischt suy nit gescheidar / liebar luog?

Ein Rund-vmb:
An eine grosse F. &c.

   Ein kleines weyl / als ohn gefährt
Ich euch in einem Sahl gefunden /
Sah ich euch an / bald mehr vnd mehr
Hat ewer haar mein hertz verbunden:
   Jhr auch lieb-aügleten mir sehr /
Da durch ich weiß nicht was empfunden /
Das mein Geist / dan leicht dan schwer /
Auß lieb vnd layd alßbald geschwunden
             Ein kleine weiyl.
Biß ich von ewrer augen lehr /
Vnd jhr von meiner seufzen mähr
Die schuldigkeit der lieb verstunden;
Darauf wir heimlich ohn vnehr [honneur]
Einander frölich überwunden
             Ein kleine weyl.

Von den Frawen A. Hahnin.
Botz Creutz/ wie ist ( O schand / O schmach!)
Der heurat ein verdöcktes essen!
O hertzleyd nimmer zu vergessen!
Mit seuftzen die Fraw hahnin sprach.
Ich hoffet / als man jhn mir gab /
Das einen hahnen ich genommen /
So hab ich / (ach weh! daß ich hab)
Nur einen copaunen bekommen.

Von Heintz Knollen und seinem Weib.
Du bist die ursach selbs, sprach zu dem Weib Heintz Knoll /
Daß unsre junge Baaß den Bauch schon voll /
Weil du jhr liessest stehts hofieren und liebkosen.
   Es wär / antwortet sie / ein wunderlicher boß /
Daß ich verschlossen hielt ein schwaches Jung-fraw-schloß /
Zu welchem jederman den schlüssel in den hosen.

Der Frawen M.v.Sherstehts Grabschrifft.
Hie vnden liget nicht ohne klag /
Die sunst ohn klag stehts vnden lag.

Grabschrifft für J.Windischen.
Weil jhm wind machen zugemein /
Weil sein mund plaudern wolt allein /
Must jhm das grimmen tödlich sein.
   Dan hät sein hinder nicht geschwigen /
Würd er so bald allhie nicht ligen.